Muschdrlendle 1977-2010 Lied hören

 

An dr Schbitz vo älle Bondesländer
Schdoot a Land wie s kaum a scheeners geit - fallera.
S blüüt em Früüjoor, Sommer, Herbscht ond Wender,
S isch halts Muschdrlendle, sagat älle Leit.

Oefach bombamäßige Erträg
En dr Landwirtschaft ond en dr Induschdrii –
Könnat onsre Ondrneemer älle Däg
Auf iir Kondo buacha; s lauft halt wie no nie.

Dass so weiderlauft en Saus ond Braus wie bisher,
Brauch mr saubra atomara Energie.
Fir da Abfall ond fird Kialong haldad Fliss her,
Ond dr Grenzwert hoeßt jetz lach mal ix gleich pi;
Wie er übermorga hoeßt, des woeß ma nie.

Manche sagat, s dädad schderba onsre Wälder;
Doch d Regierong saet: »Des goot ons gar nix a.
Do verschwenda mir no koene Schdeuergelder,
Solang ma s no als Bauholz (Brennholz) braucha ka.«

En de Schdäd vom Wirddaberger Ländle
Wird am fleißigschda vo älle Schdäd saniert:
Jedes Hochhaus kriegt a butzigs Rasarändle,
Ällas andre wird em Viereck beddoniert.

Onsre Audos, Porsche ond Mercedes,
Send de beschde Audos von dr ganza Welt.
Abr lieber laufsch gao nocham Gschäft per pedes,
No bisch schneller ond kommsch weiter für dae Geld.

En dr Landeshoaptschdad zwischa Wald ond Räaba,
Glei ondrhalb vom scheena Fernsääturm,
Daffat Audofaarer s Dageslicht erläaba,
Dr normale Mensch kriacht onda wie a Wurm.

Wennde en dr Ondrfiirong ammol schdao bleibsdch,
Ond zom Beischbiil so a Liad wie des do sengsch,
Kommt dae Fraend ond Helfer, fiirt de ab ond schao bleibsch
Nemme schdao, weil de mit dam jetz zemmahengsch.

Onser Land hot König, aber oone Krona:
Vornadra ein gottsallmächtiger Konzern (der middam Schdern).
Der kassiert von ons die diggschde Subvenziona,
Ond Minischder schbiilat d Geldbriefträger gern –
Über s Trinkgeld schwätzt ma nix, des bleibt intern.

Günther Öttinger, der hot mol gmoet: »Jetz danz ich
Aufam Glatteis hendrm Filbinger saem Sarg.«
Nach der Rutschpartie vor Stuttgart einundzwanzig
Reibt er sich saen Zenga em Europapark. Ou nou, ou nou,
»Ou my Nousaboun does whya very arg!

«Stefan Mappus, dieses junge, superschlanke,
Falsche Häslein hinter Grube saß und schlief.
S ganze Schuschdr-Schbekulandapack sagt: »Danke!«
Bloß dr Landessäaga hängt verquer ond schief.
Ja Noe! Ja Noe!
S leit koe Säaga en dam Filz ond Mief!

Do wird gmauschlat, do wird gschmiert, ond bloß no gloga,
Dass s vom Keller onda hoch zom Hemmel schreit.
S hot schao d Schiena von dr Eisabaa verboga,
Ziagat d Notbrems, Leit, jetzt braucht's an Schdreit,
Dass s koen Tunnelbau zu Babel bei ons geit!

Wer mit Wasserwerfer d Bürger ausam Park treibt,
Wer mit Pfefferspray ond Tränagas regiert
Ond sich wundert, dass der Widerstand so stark bleibt,
Der hot nix, aber ao wirklich nix kapiert –
Höchste Zeit dass diese Bande abmarschiert!
Höchste Zeit dass Boris Palmer kandidiert.

S hand doch siibnasächzigdausad onderschriiba,
Se wellat mitentscheida wo der Baahof bleibt.
So vill Schduagrtr hots no nie aufd Schdrooßa triiba,
Wies jetzt zwoe mol en dr Woch scho doher treibt.
Ja Woll! Ja Woll!
Ond jetz kämpfmr, bis der Bagger schdanda bleibt,
Bis dr Grube ons da Bauschtopp unterschreibt,
Bis dr Schuster ons saen Rücktritt unterschreibt.
Mir bleibat oba, bis der Baahof oba bleibt!!

(Text und Musik: Thomas Felder) - © Musik&Wort.
Jede Vervielfältigung des Liedes »Muschdrlendle« ist ausdrücklich erwünscht.
Der Autor bittet aber um Quellenangabe und Benachrichtigung.